Shkruan: Granit Duriqi
Ka ditë kur zemra më rrah më fort se zakonisht. Jo për veten, as për politikën e ditës, por për kujtimin e atyre që nuk janë më, dëshmorëve që ia falën jetën këtij vendi. Çdo gur i Lipjanit mban kujtime, çdo shtatore rrëfen histori gjaku, dhimbjeje e sakrifice. Çdo lapidar është amaneti i një jete të prerë në mes. Kur shkoj para tyre, aty nuk ka vend për fjalë boshe apo duartrokitje të stisura, aty flet vetëm e vërteta.
Megjithatë, më dridhet shpirti kur shoh intriga të cekëta që guxojnë të shfaqen para shtatoreve. Fytyra që për vite mungonin në përvjetore e përkujtimore, sot vrapojnë të rreshtohen me ngut, të bëjnë ndonjë foto apo video, vetëm pse janë “politikisht aktivë”. Takimet me lapidaret e dëshmorëve bëhen më të shpeshta kur aktivizoheni politikisht, kurse po rrallohen sapo dinamika politike bie. Për disa, kujtimi i dëshmorëve është pjesë e dekorit elektoral, dhe ky kontrast më dridh shpirtin.
Shtatëtorët e dëshmorëve dhe heronjve tanë në Lipjan janë ngritur në një ditë historike, më 28 nëntor 2017-të, në datëlindjen e komandantit legjendar Adem Jashari, plot 18 vite mbas luftës. Nëse me të vërtetë i kishit respektuar kaq shumë, këto do të duhej të ngriheshin më herët, sapo kishit mundësinë dhe pushtetin. Kjo vonesë fluturon si thumb drejt atyre që sot sillen si përkujdesës të kujtimeve që kanë ardhur shumë vonë, duke e bërë respektin ndaj dëshmorëve një çështje politike e stisur.
Gjatë këtyre viteve kam takuar familje dëshmorësh të lënë nën mëshirën e fatit, disa prej të cilëve edhe janë bojkotu në datat e tyre historike. Kam parë invalidë të luftës që jetonin në kushte të mjerueshme, veteranë që kafshatën e gojës për fëmijët e sigurojnë nga kanaqet e kontenjerëve, dhe kam ndjerë vuajtjet e tyre që tregojnë fortësinë e shpirtit njerëzor. Për këto familje, çdo ditë është një kujtim i gjallë i atyre që dhanë gjithçka për kombin.
Faleminderit familjeve të dëshmorëve, invalidëve të luftës dhe veteranëve për forcën, durimin dhe nderin që tregojnë çdo ditë. Ju që qëndroni të palëkundur në mes të harresës dhe indiferencës, jeni shembulli i vërtetë i sakrificës dhe dashurisë për atdheun.
Faleminderit gjithashtu qeverisjes komunale që në një ditë historike ngriti shtatoret që nderojnë kujtimin e tyre. Ky veprim, në datëlindjen e komandantit legjendar Adem Jashari, nuk është thjesht një akt simbolik, por një përkujdesje e drejtpërdrejtë ndaj trashëgimisë dhe krenarisë tonë kombëtare. Kjo tregon se respekti i vërtetë nuk matet me fjalë të bukura, por me veprime konkrete.
Nuk mund të mos theksoj kontrastin e hidhur, sot ka të shumtë ata që, kur shkrepet fotoja, fytyra e tyre është e kthyer kah aparati duke buzëqeshur, e jo kah shtatorja. Ky detaj i vogël tregon arsyen e vërtetë të vizitës së tyre dhe e zbërthen çdo hipokrizi politike.
Dëshmorët dhanë jetën për lirinë e këtij vendi, jo për fasadën tuaj politike. Ata dhanë jetën që ky vend të jetojë i lirë, që ky popull të ecë me dinjitet. Ky popull nuk ka nevojë për show, ka nevojë për drejtësi, për kujdes ndaj familjeve të tyre, për respekt të vërtetë.
Qytetarët mund t’ju duartrokasin kur flisni, por gjykojnë kur heshtin. Para shtatoreve, nuk keni përballë vetëm bronzin e ftohtë, keni sytë e një kombi që nuk harron.
COMMENTS