Sonte, Kryetari i Komunës së Lipjanit dhe kandidati për mandatin e katërt, Imri Ahmeti, zhvilloi një takim të jashtëzakonshëm me qytetarët, ku u ndje fuqishëm përkrahja dhe besimi i madh i lipjanasve në vizionin e tij për të ardhmen e komunës. Atmosfera ishte e mbushur me energji dhe entuziazëm, një dëshmi e qartë se rrugëtimi ynë i përbashkët po bëhet çdo ditë e më i fortë.
Çdo ditë, të rinj e të reja me energjinë e tyre, personalitete që kanë dhënë kontribut në ndërtimin e këtij shteti, përfaqësues të kategorive të dala nga lufta, artistë të ndryshëm dhe sportistë të njohur, po i bashkohen vizionit të Kryetarit Ahmeti. Ky mobilizim gjithëpërfshirës është dëshmi se Lipjani është i bashkuar rreth një qëllimi të përbashkët – zhvillimit dhe përparimit.
Në fjalën e tij, Kryetari Ahmeti kujtoi të arriturat konkrete në infrastrukturë, në arsim, shëndetësi dhe ekonomi, duke i vënë theksin projekteve të reja që do ta transformojnë komunën edhe më shumë në vitet që vijnë. Ai u shpreh se besimi dhe mbështetja e qytetarëve është forca më e madhe që e shtyn të punojë me përkushtim të pandalur për Lipjanin.
Takimi i sontëm ishte edhe njëherë dëshmi se mobilizimi i qytetarëve përreth Kryetarit Ahmeti është shumëfish më i madh sesa tek kundërkandidatët, duke e bërë të qartë se Lipjani tashmë e ka përcaktuar rrugën e tij.
COMMENTS