Kryetari i Komunës së Lipjanit, Imri Ahmeti, sot në mëngjes vizitoi Shkollën e Futbollit “Lipjani 01”, ku pa nga afër fëmijët që po ushtronin me përkushtim dhe entuziazëm. Ai theksoi se sporti është forcë, disiplinë dhe shpresë për të ardhmen, prandaj investimet në këtë sektor kanë qenë dhe do të mbeten prioritet i qeverisjes lokale.
“Është kënaqësi e veçantë të shoh fëmijët tanë duke ndjekur ëndrrat e tyre sportive. Sporti është edukim dhe formim i karakterit, ndaj përkrahja jonë për të do të jetë e vazhdueshme”, ka deklaruar Ahmeti.
Në kuadër të këtij mandati, Komuna e Lipjanit ka ndërtuar tre stadiume me standarde të larta, të cilat sot i shërbejnë me dinjitet komunitetit sportiv. Po ashtu, stadiumi i qytetit në Lipjan është shndërruar në strehë të ekipeve të Superligës, duke dëshmuar kapacitetet dhe përkushtimin tonë për sportin elitar.
Në vitet e fundit janë realizuar edhe projekte të tjera të rëndësishme në infrastrukturën sportive, si:
Ndërtimi i palestrës sportive në qytet, e cila sot shërben për qindra sportistë të disiplinave të ndryshme;
Investime në stadione dhe fusha të vogla sportive në qytet dhe në fshatra;
Rritje të subvencioneve për klubet dhe sportistët lipjanas, si mbështetje direkte për sukseset e tyre.
Kryetari Ahmeti përgëzoi menaxhmentin e KF “Lipjani 01” për rezultatet dhe përkushtimin në punën me gjeneratat e reja, duke theksuar se Komuna do të jetë gjithmonë në mbështetje të sportistëve lipjanas.
“Lipjani ka energjinë, pasionin dhe talentin e gjeneratave të reja. Detyra jonë është t’ua hapim rrugën drejt fitoreve të reja”, u shpreh Ahmeti.
COMMENTS