Megjithëse pa veprime konkrete, Lidhja Demokratike e Kosovës vazhdon të kërkojë mbështetje nga partitë e tjera parlamentare, që vendin ta çojë në zgjedhje.
Këtë e ka përsëritur sërish në seancë plenare shefi i deputetëve të LDK-së, Avdullah Hoti, raporton KTV.
Ai ka thënë se Qeveria Haradinaj po e udhëheq vendin me ministra me aktakuza, derisa Lumir Abdixhiku tha se kjo Qeveri ka thyer rekord për këtë çështje.
Vetëvendosje mbështet rrëzimin e kësaj Qeverie, që thotë se u bë për ta kaluar demarkacionin, asociacionin e për të menaxhuar me Gjykatën Speciale.
Ndërkohë, deputeti Albin Kurti, ka ngritur shqetësimet rreth krizës në Telekomin e Kosovës.
Ai ka thënë se të gjithë ata që e sollën në këtë gjendje do të dalin para drejtësisë.
Tha se bordi i Telekomit vazhdon të jetë politik.
Deputeti Driton Çaushi nga grupi i pavarur, ka kërkuar shkarkimin e kryeshefit dhe Bordit të Agjencisë së Ushqimit dhe Veterinës, pas skandalit me mishin e prishur në Kosovë.
Ndërkohë, aty u kërkua sqarim nga ministri i Arsimit se cilat janë veprimet institucionale për shkollat që mësojnë me plan-program të Serbisë.
Në seancë u fol edhe për FSK-në.
Ndërkohë, shumë debat u bë kur opozita kërkoi që seanca plenare të plotësohej edhe me një pikë tjetër, atë të themelimit të Komisionit Hetimor për dëbimin e shtetasve turq nga Kosova, por megjithatë ajo nuk arriti të bëhet pjesë e seancës.
COMMENTS