Talenti brazilian, Gabriel Barbosa ëndërron të luajë përsëri me klubin nga Serie A.
Barbosa i njohur si Gabigol po kalon në një formë të mirë në Brazil, ku po luan rregullisht me Santosin dhe po ndihmon skuadrën drejt rezultateve pozitive.
Sulmuesi brazilian që është i huazuar nga Interi, foli për aventurën e tij te zikaltrit dhe pranoi se dëshiron të rikthehet edhe njëherë në San Siro, por këtë radhë për të luajtur dhe për të treguar vlerat e tij në fushë.
“Eksperienca në Europë, dhe jeta në Milano, më kanë rritur shumë si profesionalisht, ashtu edhe në aspektin njerëzor. Te Santosi po luaj rregullisht dhe ndjej besim rreth vetes, dy elementë që janë thelbësorë në paraqitjen e një futbollisti”, ka thënë Gabigol.
“A do të kthehesha tek Interi? Patjetër që po, pasi unë jam lojtar i Interit”, thotë ai.
“Pres që të përfundojë sa më mirë periudha e huazimit te Santosi, për të diskutuar më pas për të ardhmen time. Do të rikthehesha me kënaqësi atje, por këtë herë për të luajtur dhe për t’i shërbyer skuadrës”, ka theksuar ai.
COMMENTS