Sonte në Europa League zhvillohen ndeshjet e para të 1/16 së finales, ku do të kemi disa paraqitje të shqiptarëve, e madje edhe një përballje direkte.
Në San Sebastian në stadiumin “Anoeta” me fillim nga ora 19:00, takohen nikoqirët e Real Sociedad dhe skuadra austriake e Salzburg.
Në njërën anë tek vendasit, do të kemi Adnan Januzaj, i cili këtë edicion me Sociedad në Europa League i ka zhvilluar katër ndeshje dhe ka asistuar një herë. Kurse, tek ekipi austriak pritet të paraqitet Valon Berisha, i cili në Europa League në tetë paraqitjet e tij me Salzburg, ka arritur të konkretizojë 2 herë.Përndryshe kjo është hera e parë që skuadrat në fjalë janë duke u takuar, derisa përvojë më të madhe në Europa League kanë austriakët, për të cilët kjo është hera e pestë që janë në këtë fazë të kësaj gare. E në anën tjetër, baskët nga San Sebastian e shohin për herë të parë fazën e 1/16 së finales në Europa League.Për Real Sociedad është hera e parë që ndeshet me një skuadër austriake, mirëpo kishin 12 takime pa humbje në shtëpi në garat e Kupës së Uefa-së dhe Europa League, deri në ndeshjen e fundit në grupin L të këtij sezoni, kur u mposhten në “Anoeta” nga Zenit me rezultat 1-3.Kurse, Salzburg kanë 12 përballje me ekipet spanjolle, prej të cilave kanë 3 fitore, 8 humbje dhe 1 barazim.
Fitoren e vetme Salzburg në tokën spanjolle, e kanë në sezonin 2009/10 të Europa League në fazën e grupeve, duke e mposhtur Villarreal me rezultat 1-0, me ç’rast atë sezon patën një përmbyllje perfekte në grup, me 6 fitore nga 6 ndeshje. /Insporti
COMMENTS