Dështimi i dhënies së betimit të gjyqtarëve e prokurorëve të Serbisë, para presidentit të Kosovës, Hashim Thaçi, për të nisë së zbatuari Marrëveshjen për Drejtësi, është vazhdimësi e Serbisë për të mos zbatuar marrëveshjet e arritura në Bruksel.
Një qasje e tillë e Serbisë, sipas njohësve të çështjeve të drejtësisë në Kosovë, po shihet më shumë si një dështim i Bashkimit Evropian.
Ehat Miftaraj, hulumtues i lartë në Institutin i Kosovës për Drejtësi (IKD), ka thënë për lajmi.net, se Serbia në vazhdimësi gjen mënyra për të mos zbatuar marrëveshjet e arritura në Bruksel.
“Serbia në vazhdimësi gjen mënyra për të mos zbatuar marrëveshjet e arritura në Bruksel, përfshirë atë te drejtësisë. Një qasje e tillë më shumë duhet shikuar si një dështim i vet Bashkimit Evropian dhe Përfaqësueses së Lartë Mogherini, të cilët nuk shfrytëzojnë mekanizmat që kanë në dispozicion për të obliguar Serbinë për të zbatuar marrëveshjet e arritura”, ka thënë Miftaraj për lajmi.net.
Miftaraj ka thënë se më këtë qasje Serbia po dërgon mesazh që institucionet e Kosovës shumë lehtë bien preh e mashtrimeve.
Sot ishte paraparë që dyzet e dy gjyqtarëve dhe katërmbëdhjetë prokurorë serbë të japim betimin para presidentit Thaçi, që ti nisin punën në sistemin gjyqësor dhe prokurorial të Kosovës, si rezultat i Marrëveshjes për Drejtësi të arritur në Bruksel mes Kosovës dhe Serbisë.
Por, një gjë e tillë nuk ndodhi, pasi prokurorët dhe gjyqtarët serbë nuk ju përgjigjen ftesës së Presidentit.
Në reagimin e tij, i pari i vendit ka thënë se prokurorët dhe gjyqtarët u penguan nga Serbia.
“Sot, dekretimi i gjyqtarëve dhe prokurorëve nga komunitetet jo shumicë, nuk ndodhi për shkakun që kandidatët për gjyqtarë dhe prokurorë, nuk erdhën për dekretim. Ata nuk erdhën ngaqë u penguan nga Republika e Serbisë, me qëllimin e vetëm që të mos lejojë integrimin e tyre në sistemin gjyqësor dhe prokurorial të Kosovës. Është ky edhe një hap nga hapat e shumtë që Republika e Serbisë ndërmerr kundër qytetarëve tanë, ngase inkuadrimi i gjyqtarëve dhe prokurorëve nga radhët e komuniteteve jo shumicë në Republikën e Kosovës, ka rol të madh në jetën e komuniteteve, në realizimin e të drejtave të tyre dhe në sigurinë e qasjes së barabartë në drejtësi”, thuhej ndër të tjera në reagimin e Presidentit.
Ndërsa, Miftaraj ka thënë se Kosova duhet të reflektojë ndaj Serbisë dhe BE-së, në procesin e dialogut më Serbinë.
“Qasja e tillë e Serbisë dhe BE-së duhet jetë reflektim për Kosovën dhe qasjen që duhet pasur në raport jo vetëm me Serbinë por edhe BE-në në procesin e dialogut. Mos zbatimi i marrëveshjeve nga ana e Serbisë dëshmon se marrëveshjet e arritura më shumë po shërbejnë për të rregulluar imazhin dhe kredibilitetin e Serbisë në raport me bashkësinë ndërkombëtare se sa që kanë për qëllim të normalizimit të raporteve ne Kosovën”, ka thënë Miftaraj për lajmi.net.
Për mos zbatimin e Marrëveshjes për Drejtësi ka reaguar dhe Bashkimi Evropian, duke shpreh keqardhje për kërkesën e Serbisë që integrimi i personelit serb në gjyqësorin e Kosovës të shtyhet.
Marrëveshja për Drejtësi mes Kosovës dhe Serbisë me ndërmjetësimin e BE-së është nënshkruar më 10 shkurt të vitit 2015.
Kjo marrëveshje parashihte që sistemi gjyqësor dhe prokurorial i Kosovës të shtrihej edhe në veri të vendit, pjesë e të cilit do të ishin edhe gjyqtaret dhe prokurorët serb.
COMMENTS