Zëvendëskryeministri i Kosovës, Fatmir Limaj, ka thënë se presidenti i Kosovës nuk duhet kurrsesi të përzihet në kompetencat e Qeverisë së vendit.
Në emisionin “Pressing”, me Leonard Kerqukin, në televizionin T7, Limaj ka thënë se nëse kryeministri Ramush Haradinaj e lejon, le të ia japë punën presidentit Hashim Thaçi.
“Unë si kryeministër kurrë s’do të kisha lejuar që Presidenti, dhe askush tjetër, në fushën e Qeverisë të përzihet”, është shprehur Limaj.
“Përgjegjësinë për Qeverinë e kemi ne. Dhe ne e dimë kujt i japim përgjegjësi”, ka theksuar kreu i Nismës Socialdemokrate, raporton Gazeta Express.
“I japim përgjegjësi Parlamentit dhe qytetarëve”, ka shtuar Limaj.
Ai ka thënë se pret që secili ta kryejë punën e vet të plotë. “S’ka nevojë”, ka thënë Limaj, që dikush të përzihet në punët e tjetrit. /Express/
COMMENTS