Grupi i të rinjëve Youth for Equality – Y4E fton të rinjtë 15-25 vjeç të marrin pjesë në festivalin një ditor “LIPfest”, me datë 11 gusht 2018, e shtunë, nga ora 11:00, në Sheshin “Adem Jashari”, në Lipjan.
Rinia e Lipjanit e shënon Ditën e Rinisë me LIPfest. Midis një gamë të gjerë aktivitetesh të ndryshme të zhvilluara nga rinia lipjanase për këtë ditë rinore, në festivalin “LIPfest” do të ofrohet edhe mundësia e të mësuarit më shumë për rëndësinë e barazisë dhe gjithëpërfshirjes duke u argëtuar dhe shpërblyer në të njejtën kohë, me disa kënde të argëtimit si: këndi i piktures, këndi i lojrave, këndi i muzikës dhe i ushqimit. Gjatë festivalit do të bëhet ndarja e shpërblimeve për të rinjtë/rejat më të talentuar/a.
Përveç zhvillimit të njohurive, pjesëmarrësit do të shkëmbejnë përvojat e tyre me qëllim të krijimit të një hapsire socializuese e cila do i motivonte rinin e Lipjanit për të përsëritur këtë iniciativë prap. Përfshirja e të rinjve në aktivitete të tilla për barazi dhe vendimmarrje është një nxitës kryesor për t’i fuqizuar ata dhe për të rritur ndjenjën e tyre të përkatësisë dhe qytetarisë aktive.
LIPfest zhvillohet në kuadër të projektit Social Act, i përkrahur edhe nga Komuna e Lipjanit, i cili ka për qëllim ngritjen e kapaciteteve të të rinjëve dhe të rejave në të menduarit kritik, shkathtësitë avokuese, shkathtësitë e buta dhe në përpilimin dhe udhëheqjen e inovacioneve sociale që synojnë gjithëpërfshirjen sociale në Kosovë.
Rrjeti i Edukatorëve Bashkëmoshatarë (PEN), në mbështetje nga projekti “Përkrahja e Luksemburgut për shoqërinë civile në Kosovë” i financuar nga Qeveria e Dukatit të Madh të Luksemburgut dhe menaxhuar nga Fondacioni Kosovar për Shoqëri Civile – KCSF, me kënaqësi ju fton të merrni pjesë në Festivalin një ditor “LIPfest”.
COMMENTS